ദോഹ: ഖത്തറിലേക്കും ഖത്തറിൽ നിന്നുമുള്ള യാത്രക്കാർനിർബന്ധമായും പാലിക്കേണ്ട കസ്റ്റംസ് ഡിക്ലറേഷൻനടപടിക്രമങ്ങളെക്കുറിച്ച് ജനറൽ അതോറിറ്റി ഓഫ് കസ്റ്റംസ് മുന്നറിയിപ്പ് നൽകി. 50,000 ഖത്തർ റിയാൽ അല്ലെങ്കിൽ അതിലധികം മൂല്യമുള്ള പണം, വിലപിടിപ്പുള്ള ആഭരണങ്ങൾ, സ്വർണം, വിലയേറിയ കല്ലുകൾ, അല്ലെങ്കിൽ കൈമാറ്റയോഗ്യമായ ധനകാര്യ ഉപകരണങ്ങൾ കൈവശമുള്ളവർ രാജ്യത്ത്പ്രവേശിക്കുമ്പോഴും പുറപ്പെടുമ്പോഴും കസ്റ്റംസ് ഡിക്ലറേഷൻ ഫോം പൂരിപ്പിക്കണം.
വിമാനത്താവളങ്ങൾ, തുറമുഖങ്ങൾ, കരമാർഗ്ഗ അതിർത്തികൾ എന്നിവിടങ്ങളിലെ കസ്റ്റംസ്ഓഫീസുകളിലൂടെയോ ഇലക്ട്രോണിക് ഡിക്ലറേഷൻ പ്ലാറ്റ്ഫോം വഴിയോ ഫോം സമർപ്പിക്കാം.
ഈ സംവിധാനം 2019 ലെ കള്ളപ്പണം തടയൽ, ഭീകര ധനസഹായ വിരുദ്ധ നിയമം (നമ്പർ 20), അതിന്റെ എക്സിക്യൂട്ടീവ് റെഗുലേഷൻസ് എന്നിവയുടെ ഭാഗമായാണ് നടപ്പാക്കുന്നത്.
ഖത്തർ കസ്റ്റംസ് അതോറിറ്റി വ്യക്തമാക്കി:
ഖത്തർ കറൻസി ഉൾപ്പെടെയുള്ള വിദേശ നാണയങ്ങൾ, ട്രാവലേഴ്‌സ് ചെക്കുകൾ, ബിയറർ ചെക്കുകൾ, പ്രോമിസറി നോട്ടുകൾ, സ്വർണം, വെള്ളി, ഡയമണ്ട്, മരതകം, മാണിക്യം, മുത്ത് തുടങ്ങിയ വിലയേറിയ ലോഹങ്ങളും കല്ലുകളും ആകെ മൂല്യം 50,000 റിയാൽകവിയുന്നുവെങ്കിൽ ഡിക്ലറേഷൻ നിർബന്ധമാണ്.
ഡിക്ലറേഷൻ നൽകാതിരിക്കുകയോ, തെറ്റായ വിവരങ്ങൾ നൽകുകയോ, പണത്തിന്റെ ഉറവിടം സംബന്ധിച്ച വിശദീകരണം നൽകാൻ വിസമ്മതിക്കുകയോ ചെയ്താൽ കടുത്ത നിയമനടപടികൾ നേരിടേണ്ടിവരും.
നിയമലംഘനം നടത്തിയാൽ
പരമാവധി 3 വർഷം വരെ തടവ്, അല്ലെങ്കിൽ
1 ലക്ഷം മുതൽ 5 ലക്ഷം റിയാൽ വരെ പിഴ, അല്ലെങ്കിൽ
കൊണ്ടുപോകുന്ന തുകയുടെ ഇരട്ടിയോളം പിഴഎന്നിവയിൽ ഏത് കൂടുതലാണോ അത് ശിക്ഷയായി ലഭിക്കും.